«Date» – ein Gedicht von Walter Däpp
03.06.2022
Walter Däpp hat an der Tavolata-Tagung für Schmunzeln gesorgt. Der begnadete Dichter hat seinen Auftritt aufgezeichnet und stellt ihn hier der Tavolata-Gemeinschaft zum Nachlesen zur Verfügung. E Guete!
‹Date›
Di beide hei sech im Internet glehrt kenne, wie das hützutags gang u gäb isch. U itz hei si sech uf ihres erschte lybhaftige ‹Date› i re Beiz gfröit. Är het sech gly entschide: Gschnätzlets mit Röschti. Si het sech Zyt gno – u d Spyscharte nach Fleischlosem, Histaminarmem u Laktosefreiem düregforschtet. U nach gfährleche Spure vo Cholehydrat u Glutamat.
Als Apéro nähm si afe e chaltpresste Bio-Tomatesaft. D Folsüüri, wo drinn syg, gäb Chraft. Är het e Stange bsteut, wüu Bier – das säg ja scho d Wärbig – «etwas Gutes» syg. Mit Bier u Tomatesaft hei si de aagstosse, di beide. Dass ihrer mügleche nöie Partnerschaft allerdings de Salz u Pfäffer chönnte fähle, het sech gly zeigt: Das Salz u dä Pfäffer uf emTisch hei re nämlech nid zuegseit. Bi ihre syg Silver-Kalahari-Salz u Tiger-Malabar-Pfäffer aagseit.
Är het se einigermasse ratlos aagluegt, de aber o probiert, öppis Gschyds über syni Ässgwohnheite z säge. Är heig itz aube nid nume i Spiegu, sondern o i Choleschterinspiegu gluegt u chuum Eier, Anke, Chäs u Würscht ggässe. Derby syg das, wi me usegfunge heig, Chabis: Was me o ässi, wäg em Choleschterin sygs wurscht.
Si het ds Brotchörbli uf em Tisch uf d Syte gschobe u gseit: O bim Brot gsei si rot. Weize mach ds Hirni kabutt, Brot mach dumm. U o das Hanewasser da mach se chrank: Si trink nume basisch-antioxidativs Aktivwasser. U o das nume us mene Glas, wo mit däm Wasser abgwäsche syg.
Är het es trochnigs Muu übercho, drümau läär gschlückt u statt es zwöits Bier grad d Rächnig bsteut. Das ‹Date› het em irgendwie nid so rächt zuegseit.
Walter Däpp, «So alt wie hütt bin i no nie gsi», Zytglogge Verlag